കേരള മുസ്‌ലിംകള്‍ക്കിടയില്‍ ഏറ്റവും കൂടുതല്‍ ജനപിന്തുണയാര്‍ജ്ജിച്ചിട്ടുള്ള പ്രശസ്തരായ സുന്നിപണ്ഡിത മഹത്തുക്കളുടെ കൂട്ടായ്മയാണ് സമസ്ത കേരള ജംഇയ്യത്തുല്‍ ഉലമ. മുന്‍കാലങ്ങളില്‍ നിലനിന്നിരുന്ന വ്യക്തിഗത നേതൃത്വത്തില്‍നിന്നും സംഘടിത പ്രസ്ഥാനങ്ങളിലേക്കുള്ള മൗലികമായ മാറ്റം കേരള മുസ്‌ലിംകള്‍ക്കിടയില്‍ പൊതുവെ ദൃശ്യമായത് 1921 ന് ശേഷമുള്ള കാലഘട്ടത്തിലാണ്.
പശ്ചാത്യന്‍ നടപ്പുരീതികളിലുള്ള ആധുനികവല്‍കരണ ശ്രമങ്ങള്‍ക്ക് വേഗം കൂടുന്നതും മുഹമ്മദ് ഇബ്‌നു അബ്ദുല്‍ വഹാബി (1702 - 1793) ന്റെ പുത്തന്‍ ആശയങ്ങളും റശീദ് റിള (1865 - 1935) സ്വയം വിളിച്ച സലഫിസവും മുഹമ്മദ് അബ്ദു(1814 - 1897)വിന്റെ ഇസ്‌ലാമിക ആധുനികതയും ജമാലുദ്ദീന്‍ അഫ്ഗാനി(1939-1997) യുടെ പാന്‍ ഇസ്‌ലാമിസവും ഉത്തരേന്ത്യയിലെ ത്വരീഖെ മുജാഹീദിനെ പോലുള്ള ലിബറല്‍ചിന്താധാരകളും കേരള മുസ്‌ലിംകള്‍ക്കിടയില്‍ പടര്‍ന്നുപിടിക്കുന്നതും അതിന്റെ ദൂഷ്യഫലങ്ങളും ഉഖ്‌റവിയായ ഉലമാഇനെ കര്‍മ്മനിതരാക്കി. പരലോക ചിന്തയില്‍ മുഴുകിയ സുമനസ്സുള്ളവരുടെ ഇടപെടല്‍ ഫലം കണ്ടു.
സീതി സാഹിബ്, കെ.എം. മൗലവി, ഇ.കെ. മൗലവി തുടങ്ങിയ നേതാക്കളുടെ കീഴില്‍ 1922ല്‍ തിരുകൊച്ചി സംസ്ഥാനത്തെ കൊടുങ്ങല്ലൂരില്‍ രൂപീകൃതമായ കേരള മുസ്‌ലിം ഐക്യ സംഘത്തിലൂടെയാണ് കേരളത്തില്‍ ആദ്യമായി പുതിയ വാദഗതികള്‍ പുറത്തുവരാന്‍ തുടങ്ങിയത്. തൊട്ടുമുമ്പ് നിഷ്പക്ഷ സംഘമെന്ന പേരില്‍ ഒരു റിബറലിസം രൂപപ്പെട്ടിരുന്നു. സംസ്ഥാനത്ത് അങ്ങിങ്ങായി ചിന്നിച്ചിതറിക്കിടന്നിരുന്ന പുത്തന്‍ പ്രവര്‍ത്തനങ്ങളെ ഏകോപിപ്പിക്കാന്‍ ഈ സംഘടന യത്‌നിച്ചു. നിശ്പക്ഷ സംഘവും ഐക്യസംഘവും ഇസ്‌ലാമിലെ സമ്പ്രദായിക രീതികളെ വെല്ലുവിളിച്ചു. പിന്നീട് ഇവര്‍ 1924ല്‍ ആലുവയില്‍ നടന്ന ദ്വിദിന സമ്മേളനത്തില്‍ കേരള ജംഇയ്യത്തുല്‍ ഉലമ രൂപീകരിച്ചു. ഈ ദ്വിദിന സമ്മേളനത്തില്‍ നിരവധി പണ്ഡിതന്‍മാര്‍ പ്രത്യേക ക്ഷണിതാക്കളായിരുന്നു. തുടക്കത്തില്‍ ഈ പണ്ഡിതസംഘടനക്ക് വലിയ എതിര്‍പ്പുകള്‍ ഉണ്ടായിരുന്നില്ല. കാരണം പുറത്തൊന്നും അകത്തൊന്നുമായിരുന്നു. സംഘടനയുടെ നയം. പൊന്നാനിയിലെ മഖ്ദൂമികളുടെ കാര്‍മികത്വത്തിലുള്ള പണ്ഡിതമഹത്തുക്കളുടെ മാര്‍ഗനിര്‍ദ്ദേശങ്ങള്‍ക്കുകീഴില്‍ പുഷ്കലമാകുകയും നൂറ്റാണ്ടുകളായി മുസ്‌ലിംകള്‍ നിരാക്ഷേപം അനുവര്‍ത്തിച്ചു പോരുന്നതുമായ പാരമ്പര്യ ഇസ്‌ലാമിനെ ആക്രമിക്കാന്‍ ഇക്കൂട്ടര്‍ തങ്ങളുടെ സംഘടനാവേദികള്‍ മെല്ല മെല്ലെ ഉപയോഗപ്പെടുത്താന്‍ തുടങ്ങി. നിരവധി ഇസ്‌ലാമിക ആചാരാനുഷ്ഠാനങ്ങളെ ഇവര്‍ ശിര്‍ക്കും ബിദുഅത്തുമായി പ്രഖ്യാപിക്കുകയും നൂറ്റാണ്ടുകള്‍ പഴക്കമുള്ള കേരള മുസ്‌ലിംകളുടെ പരമ്പരാഗത മൂല്യങ്ങളെ അനിസ്‌ലാമികമായും വ്യതിയാനങ്ങളായും ചിത്രീകരിക്കുകയും ചെയ്തു. ഖുറാഫികള്‍ (അന്ധവിശ്വാസികള്‍) എന്നായിരുന്നു ഇവര്‍ യഥാര്‍ത്ഥ മുസ്‌ലിംകളെ പരിചയപ്പെടുത്തിയിരുന്നത്. ലോക മുസ്‌ലിംകളെ (മുശ്‌രിക്ക്) ബഹുദൈവ വിശ്വാസികളെന്ന് വിളിച്ചാക്ഷേപിക്കാന്‍ ഇവര്‍ക്ക് ഒട്ടും മടിയുണ്ടായില്ല. ഈ ഘട്ടത്തില്‍ ഉലമാഅ് ഉണര്‍ന്ന് പ്രവര്‍ത്തിച്ചു.
പ്രധാന ലക്ഷ്യങ്ങള്‍
1. അഹ്‌ലുസ്സുന്നത്തി വല്‍ജമാഅത്തിന്റെ യഥാര്‍ത്ഥ ആശയാദര്‍ശങ്ങള്‍ക്കനുസരിച്ച് ഇസ്‌ലാമിക വിശ്വാസങ്ങളെയും ആചാരാനുഷ്ഠാനങ്ങളെയും പ്രബോധനം ചെയ്യുകയും പ്രചരിപ്പിക്കുകയും ചെയ്യുക.
2. അഹ്‌ലുസുന്നത്തിവല്‍ ജമാഅത്തിന്റെ ആശയാദര്‍ശങ്ങള്‍ക്കെതിരെ പ്രവര്‍ത്തിക്കുന്ന സംഘടനകളെയും അവരുടെ കുപ്രചരണങ്ങളെയും നിയമാനുസൃതമായി എതിര്‍ക്കുകയും ചെറുക്കുകയും ചെയ്യുക.
3. മുസ്‌ലിം സമുദായത്തിന്റെ അവകാശ സംരക്ഷണത്തിനായി നിലകൊള്ളുക.
4. മതവിദ്യാഭ്യാസത്തിന് ഊന്നല്‍ കൊടുക്കുകയും മതവിശ്വാസത്തോടും മതസംസ്കാരത്തോടും കൈകോര്‍ത്തുപോകുന്ന മതേതര വിദ്യാഭ്യാസത്തെ പ്രോത്സാഹിപ്പിക്കുകയും അതിനാവശ്യമായത് ചെയ്യുകയും ചെയ്യുക.
5. അന്ധവിശ്വാസങ്ങള്‍, അരാജകത്വം, അധാര്‍മികത, അനൈക്യം എന്നിവ തുടച്ചുനീക്കി മൊത്തത്തില്‍ മുസ്‌ലിം സമുദായത്തിന്റെ ക്ഷേമത്തിനും ഉന്നമനത്തിനുമായി പ്രവര്‍ത്തിക്കുക.
മുശാവറ
സമസ്തയുടെ പരമോന്നത ഭരണസമിതിയാണ് മുശാവറ. ഇസ്‌ലാമിനെക്കുറിച്ച് അവഗാഹം, മതപരമായ സൂക്ഷ്മത, വിശ്വാസ്യത, അര്‍പ്പണബോധം തുടങ്ങിയ ഗുണങ്ങളല്ലാം അടിസ്ഥാനപ്പെടുത്തി തെരഞ്ഞെടുക്കപ്പെടുന്ന ഉന്നതരായ 40 പണ്ഡിതന്‍മാരാണ് മുശാവറ അംഗങ്ങള്‍. ആത്മീയ ഔന്നിത്യം നേടിയ ഉഖ്‌റവിയായ ഉലമാക്കളുടെ ഒരു കൂട്ടായ്മ. തുടക്കത്തില്‍, ഇസ്‌ലാമിനേയും മുസ്‌ലിംകളേയും സംബന്ധിക്കുന്ന ഒട്ടനവധി വിഷയങ്ങളെക്കുറിച്ച് ചര്‍ച്ച ചെയ്ത് തീരുമാനിക്കാന്‍ സമസ്ത ഇടയ്ക്കിടെ മുശാവറ യോഗങ്ങള്‍ വിളിക്കുകയുണ്ടായി. ബഹുവിധ വിഷയങ്ങളെ അധികരിച്ച് കേരളത്തിനകത്തും പുറത്തുമുള്ള മുസ്‌ലിംകള്‍ ഉന്നയിക്കുന്ന ചോദ്യങ്ങള്‍ ചര്‍ച്ചചെയ്ത് തീരുമാനിക്കല്‍ എല്ലാ മുശാവറ യോഗങ്ങളുടെയും പ്രധാന അജണ്ടയായിരുന്നു. പിന്നീട് മതവിഷയങ്ങളെക്കുറിച്ച് വര്‍ദ്ധിച്ചുവരുന്ന ചോദ്യങ്ങളും, ഹരജികളും പരിശോധിക്കാനായി മുശാവറയില്‍ നിന്നുതന്നെ ഫത്‌വാ കമ്മറ്റി എന്ന പേരില്‍ പ്രത്യേക സമിതി സമസ്ത രൂപീകരിച്ചു. ബഹുമാനപ്പെട്ട സമസ്തയുടെ പരിഗണനക്ക് വരുന്ന ചോദ്യങ്ങള്‍ക്ക് യഥാവിധി ഉത്തരം നല്‍കി മുസ്‌ലിം സമുദായത്തിന്റെ മതകീയാസ്തിത്വം സംഘടന സംരക്ഷിക്കുന്നു.
